Olga P. B.: Inuunerup kipineqarnissaanut ikiuuttoqartalissava

Inuunerup kipineqarnissaanut peqqinnissaqarfiup ikiuussinnaalernissaa Olga P. Berthelsenip nunatsinni periarfissaalersussatut angorusuppaa, assullu inuiaqatigiinni oqallisigillaqullugu.

Inuit Ataqatigiit sinnerlugit inatsisartuni ilaasortap taassuma naalakkersuisunut apeqquteqaateqarpoq Ileqqorissaarnissamut tunngasutigut Siunnersuisoqatigeeqalernissamut Eqqarsaqatigiit apeqqut taannarpiaq sammisimaneraat. Olga P. Berthelsen ima oqarpoq:

- Tassani pineqarpoq soorlu ilaqutariit akornanni napparsimarujussuartumik ilaqartillutik toqujartortumik nammineerlutik arlaatigut aalajangerlutik napparsimasut ilaqutariillu aalajangerlutik ikiuussinnaanissaminnut, tassami ikiuussinnaanissaanut tunngatillugu taakkua apeqqutit eqqartorneqarsimanersut paaserusullugit allagaqarpunga, isumaqarama inuiaqatigiinni oqaluuserineqartartoq ammanngitsumik pisariaqartorlu apeqqutip taassuma inuiaqatigiinni ammasumik aamma oqaluuserineqarnissaa, Olga P. Berthelsen oqarpoq.

-Uanga nammineq inuttut isumaqarpunga tanna periarfissaq nunatsinni atuutsinneqartariaqartoq. Inuit ilarpassuisa kissaatigisarmassuk aamma uanga nammineq eqqarsaatigissagukku siunissami arlaatigut taamatut misigisaqassagaluaruma periarfissatut pigerusuppara, imaanngitsoq atussagakku, kisianni periarfissaasariaqartutut uanga isigivara, oqarpoq. Taamaattumik inuunerup kipineqarnissaanut peqqinnissaqarfiup ikiuussinnaalernissaa nunatsinni periarfissaalersussatut angorusuppaa, inuiaqatigiinnilu ammasumik oqallisigeqqullugu. Naalakkersuisut akissagaluarpanni apeqqut taanna Ileqqorissaarnissamut tunngasutigut Siunnersuisoqatigiilernissamut Eqqarsaqatigiit eqqartorsimanngikkaat, taava apeqqutip eqqartorneqarnissaa kissaatigissallugu naggataagut erseqqissaavoq.

Inatsisartuni ilaasortaq peqqissaasoq Olga P. Berthelsen taama oqarpoq. Inuit Ataqatigiit apeqquteqaataat ilaatigut inuunerup kipineqarnissaannut ikiuunnissamut tunngasoq Naalakkersuisunit januaarip ulluisa 20-anni akineqareersimasussaavoq.