Ole Thorleifsen siulittaasutut tunuarpoq

Siumumeersoq Ole Thorleifsen Aningaasaqarnermut Ataatsimiititaliami siulittaasutut tunuarniarluni aalajangerpoq, tamannalu Inatsisartut ualeru ataatsimiilerpata pisortatigoortumik nalunaarutigissallugu erseqqissaatigaa.

- Aningaasanut inatsisissap suliarineqarnerani partiit arlariillutik isumaqatigiissuteqariaraluarnerat iluatsinngitsoorneq ilaatigut tunngavigalugu tunuarniarlunga aalajangerpunga. Miserratigissanngilarali, siulittaasutut siornatigut tunuarnissara kissaatigisimagaluarakku, maannalu siulittaasunngorumasumik sassartoqarmat periarfissaq atorlugu tunuarniarlunga aalajangerpunga. Ole Thorleifsen tunngavilersuivoq.

Ole Thorleifsen kimit taarserneqassanersoq pillugu Siumup Inatsisartuni gruppeformandia Otto Jeremiassen aperigigatsinni oqarpoq, Ole Thorlefsenip taartissaa Siumumi isumaqatigiissutigereerlugu, tassalu Aalisarnermut Piniarnermullu Naalakkersuisuusimasoq Simon Olsen.

Aningaasaqarnermut Ataatsimiititaliami ilaasortat namminneq inissitsitertarput, kinalu siulittaasunngussanersoq suli nalunaraluartoq, Siumup siulittaasuuffik tigummimmagu periarfissat marluinnaapput, tassalu Ruth Heilmann imaluunnit Simon Olsen.