Ole Møller decembarip 7-iani aalajangiiffigineqassaaq

Kinguaassiutitigut atornerluisimasutut killiligaanngitsumik pineqaatissinneqarsimasoq,

Ole Møller, misiligummik iperarneqassanersoq, sapaatip akunnerata tulliani aatsaat paasineqassaaq.

Danmarkimiit TV-kkut attaveqaqatigiinnikkut atortorissaarutit atorlugit Ole Møller Nunatta Eqqartuussiviani ullumi sassartinneqarpoq.

Illersuisua, Thorkild Høyer, KNR-imut ullaaq oqarpoq, suliap inernissaa neriuuteqarfigilluarini, Aasiannimi eqqartuussivik ersarissumik aalajangermat.

Tassa Ole Møller sakkortuumik pinerluttunik isumaginnittoqarfimmit nakkutigineqarluni misiligummik iperarneqassasoq, Aasiannilu eqqartuussiviup eqqartuussutitut oqariartuutigisaa Nunatta Eqqartuussivianit naqissuserneqassasoq neriuutigigini.

Ole Møller killiligaanngitsumik Herstedvesterimiittussanngorlugu 1994-imi pineqaatissinneqarpoq. Inatsisinik unioqqutitsisarsimanini pissutigalugit, Herstedvesterimi ukiut 30-t, nunatsinnilu pinerlussimasut inissinneqartarfianni, taanna paarnaarussaasarsimavoq.

Misiligummillu iperagaassanersoq Nunatta Eqqartuussiviata sisamanngornermi decembarip ulluisa arfineq aappaanni aalajangiiffigissavaa.