Ole Dorphip uppernarsarpaa Qaasuitsumi soraarsitsisoqassanngitsoq

Borgmester Ole Dorph, KNR-imut sisamanngormat oqarpoq, Qaasuitsup Kommuniani sulisut 80-it soraarsinneqartariaqartut, tamannalu piaarnerpaamik pissasoq oqaatigalugu. Borgmesteri aqaguani, tassa tallimanngornermi nalunaarpoq, soraarsitsinissaq qaammammik ataatsimik kinguartinneqarallartoq.

Qaasuitsumi Siumup gruppea KNR-imut ullaatungaa oqarpoq, sulisunik soraarsitsinissaq pissanngitsoq aningaasanillu sipaarutissanik ataatsimiititaliat tamakkerlutik nassaarniarnerisigut tamanna pinngitsoortinneqassasoq.

Siumup gruppeata ataatsimiititaliat aningaasanik nassaarnissaannik piumasaqaataat pillugu, borgmester Ole Dorphip aperaarput ataatsimiititaliat aningaasanik nassaarsinnaanersut, Ole Dorphilu ima akivoq.

- Ataatsimiititaliat aningaasanik nassaartariaqartussaassapput. Taavalu aalajangerneqartussaassaaq ataatsimiititaliat sorliit sutigut nassaarniassanersut, tassa tamanna Siumup piumasaraa, naatsorsuutigiaarpullu tamanna piviusunngortinneqarumaartoq, borgemster Ole Dorph taama akivoq imalu nangilluni.

- Aningaasaqarnermut ataatsimiititaliap soraarsitsinissamik kissaataat maanna atorunnaarsinneqarpoq, tamannalu Siumup oqariartuutaa siuteqaratta tusaavarput. Maannalu tassa sipaarniarneq siunnerfigineqarluni suliaq tamanna suliaralugu aallartinneqareerpoq.

Ole Dorphip sisamanngormat nalunaarutigaa, soraarsitsineq pinngitsoorneqarsinnaanngitsoq tallimanngormallu nalunaarutigalugu soraarsitsineq qaammammik ataatsimik kinguartinneqarallassasoq.

- Tassa sulisunik soraarsitsinissaq unitsinneqarpoq. Ataatsimiititaliallu aningaasanik ujarlernerminni kumaajaatit atorluartussaassavaat, kisianni tassa ilumoorpoq assigiinngitsunik nalunaaruteqaqattaaleraluarnerput, tamassumunnga pissutaavoq aningaasaqarnermut ataatsimiititaliaq upernassarlu nalunaarfigineqarmat suliamik uannga naammassiniaaqqullugu.

Qaasuitsup Kommuniani borgmesteri, Ole Dorph taama oqarpoq.

Qaasuitsup Kommuniani illuatungiliuttut, Inuit Ataqatigiit, tusagassiutinut ullumi allagaqarnerminni oqaatigaat, suliap ataatsimiitialianut ingerlanneqarnissaanik kissaateqarnertik, Siumup ilalermangu qujassutigalugu, apeqquserluguli, sooq borgmester-ip kommunalbestyrelse avaqqullugu suliaq naammassiniarsaringaluarneraa? Suliarmi taamak innuttaasut sullineqarnerannut attulluinnartussaatigisoq kommunalbestyrelse-mit suliarineqartariaqaraluarmat.