OL-mut peqataasalernissaq tapersersorpaat

Danskit naalakkersuisuisa nunatta OL-imi peqataatitaqartalernissaannik tapersersuinerat Folketingimit iluarisimaaneqarpoq. Kultur pillugu ataatsimiititaliap ammasumik isumasioqatigiinnerani kulturminister Brian Mikkelsen Lars-Emil Johansenimit illuatungiliuttunillu nersualaarneqarpoq.

- Kalaallit Nunaata namminersortutut olympiademi peqataasinnaanera anguniarlugu danskit naalakkersuisui Danskit olympiadeqarneq pillugu ataatsimiititaliaannut nunallu tamalaat olympiadeqarneq pillugu ataatsimiititaliaannut saaffiginnereerput, Radikalet kultur pillugu oqaaseqartartuat Elsebeth Gerner Nielsen oqarpoq.

Ukiuunerani olympiadeqarani nunatta peqataanissaminik kissaateqarnera naalakkersuisunit qanoriliuuseqarfigineqarsimanersoq paaserusullugu taassuma kultur pillugu ataatsimiititaliaq isumasioqatiserisimavaa. Soorlu naluneqanngitsutut ujakkaartartoq Martin Møller OL-imi unammeqataanngilaq, Elsebeth Gerner Nielsenili neriuppoq siunissami nunatsinnit unammiartortoqartalissasoq.

- Kalaallit Nunaannit sisorartartoq pikkorilluinnartoq ajoraluartumik ukiuunerani olympiadeqarnermi peqataanngitsoorpoq. Neriuppungali siunissami kalaallit peqataasinnaalissasut, Elsebeth Gerner Nielsen oqarpoq.

Nunat tamalaat olympiadeqarneq pillugu ataatsimiititaliaata nunarput namminersortutut akuerisinnaasaneraa apeqqutaassaaq. Akuerineqassanngippallu danskit olympiadeqarneq pillugu ataatsimiititaliaanit immikkut ittumik malittarisassiuussinikkut tamanna aqqutissiunneqarsinnaassasoq taanna isumaqarpoq.

- Kultureqarnermut ministerip Brian Mikkelsenip danskit olympiadeqarneq pillugu ataatsimiititaliaat oqaloqatigalugu qulakkeertariaqarpaa siunissami Kalaallit Nunaannit peqataatitaqartalernissaq. Elsebeth Gerner Nielsen oqarpoq.

Kultureqanermut ministerip danskit olympiadeqarneq pillugu ataatsimiititaliaata malittarisassaatai akuliukkusuffiginagit siornatigut oqarnikuummat qanoriliortoqarsinnaanersoq Elsebeth Gerner Nielsen aperingatsinni ima akivoq:

- Danskit olympiadeqaneq pillugu ataatsimiititaliaat oqaloqatigisariaqarpaa, oqaloqatiginnilluni angusaqarluartoqarsinnaavoq. Elsebeth Gerner Nielsen naggasiivoq.