OL-mut angunneq ataatsimiititami aalajangiiffigineqassaaq
Sisorarlunimi ooqattaasartartoq Øystein Slettemark OL-imut anngunnissamut Danmarkip piumasaqaatai qaangerlugit maanna annguppoq.
Sisorarlunili ooqattaasarnissamut, nunarsuaq tamakkerlugu OL-imut Ataatsimiititaliaq akuersissanersoq maanna apeqqutaalerpoq.
- OL-ernissamut sungiusarnissara tamakkiisumik maanna aallussinnaanngorpara, OL-eqarnissaata tungaanut unamminerni imminut sukataartippallaartariaqarunnaarpunga. Iluamik sungiusarsinnaanngorpunga, ooqattaasartarnikkalu pitsaanerulersinniassallugit, Øystein Slettemark nuannaaqisoq oqarpoq.
Nunarsuaq tamakkerlugu OL-imut Ataatsimiititaliaq maanna apeqqutaalerpoq, sisorarluni ooqattaasarnissamut Ataatsimiititaliaq akuersissappat Øystein Slettemark Canadami Vancouverimi OL-ernissamut aatsaat peqataasinnaassaaq.
Periarfissallu qanoq ippat?
- Periarfissaqarluarpugut. Unammisartut allattorsimaffianni normu 31-tut inissisimavugut, nunallu 28-t siulliit toqqaannartumik annguttarlutik. Nunalli ilaat tamakkiisumik peqataajumaneq ajorput, inissallu nunanut allanut tunniunneqartarlutik, taamaattumik periarfissaqarluarpugut, Øystein Slettemark oqarpoq.
Taanna Team Grønlandiminngaanniit aningaasaliisunillu allanit aningaasalersorneqarpoq, Norgimilu najugaqarpoq, tassanilu sungiusartarluni.
- OL-imut peqataanissani ukiuni arlalinni sulissutigisimavaa, piviusunngulermallu nuannaaqaaq. Ukiut arfineq-pingasut matuma siornatigulli tamanna sulissutigilerpara, Danmarkilli piumasaqaatai sakkortusimaqaat, anguniagarali maanna anguara, nuannaaqaangalu, sisorarluni ooqattaasartartoq Øystein Slettemark oqarpoq.
Øystein Slettemark Oslop ungasinngisaani orpippassuarni sungiusaleruttortoq attaveqarfigaarput. Ukiuunerani Vancouverimi OL-erneq aappaagu februaarip ulluisa aqqaneq-aappaanni aallartissaaq, februaarillu 28-ata tungaanut ingerlassalluni.
