OL-ip ilisarnaataa naggueqatitsinnit tulluusimaarutigineqarpoq
Vancouverimi Canadamiittumi ukiuunerani OL-eqarneranut atatillugu inussuup ilisarnaatigineqarnera, naggueqatitsinnit nuannaarutigineqaqaaq.
Allattoq Apollo Jeremiassen
Ukiuunerani OL-eqarnermi inuit kulturiata nittarsaanneqarnera Canadamiut pingaartissimaqaat nuannaarutigalugulu. Ukiuunerani OL-eqarnermi Inussuk ilisarnaatigineqarpoq, ilisarnaat taanna nunarsuarmiut amerlasuut ulluni makkunani takusarunnarsivaat.
Inuit Tapiriit Kanatami oqarput Canadami inuit nuannaarutigeqigaat ilisarnaatimi tamanut nittarsaanneqarnera.
Inussuk tassaavoq qangali issittumi inuit sumiissusersiniarnermini najoqqutarisartangaat. Inuit qanga paasisimasaqarnerannut, kulturiannut aamma siunissamut tunaartaqarnerannut inussuk ilisarnaatigineqartarpoq.