OL-imut peqataaniarnissani siunniuppaa

Ujakkaartartup Martin Møllerip VM-imut piumasaqaatit piffissami uani angoqqavai. Elite Sport Greenland Martin Møllerimut 2013-imi pikkorivissunik tapiissutiminik tapiissuteqaqqissaaq.
decembarip 13-at 2012 13:09

Martin Møller Jonas Thor Olsenilu Arctic Circle Racemi peqataanerminnit imminut ilisarisimareerput. Ujakkaartartut taakku marluk Østrigimi Seefeldimi novembarip naanerani unammisoqarmat aamma unammeqatigiipput, tassanilu Martin Møllerip VM-imut piumasaataasoq anguaa.

Taamaammat Martin Møllerip Danmark sinnerlugu VM-imut Val Di Fiemmemi aappaagu februaarip naanerani marsillu aallartinnerani ingerlanneqartussamut peqataanissaa ilimanartupilussuuvoq. VM-imilli suli anginerusunik anguniagaqarpoq - 2014-imimi aamma OL-eqartussaavoq, tassanilu danskit peqataatitassatut piukkusaasa ilagaat.

Elite Sport Greenlandittaaq Martin Møllerip VM-imut OL-imullu anngunnissaminik suliniuteqarnerani tapersersornissaanut piareersimavoq.

- Elite Sport Greenlandip timersortartut pimoorussinerpaat - angusarissaarnermikkut maluginiarneqartut - tapersersornissaat pingaartittuaannarpaa. Ilaatigut timersortartut siumut sammisumik pilersaarusiornissaannik nunanilu tamalaani unamminernut peqataanissaannut piumasaqaateqarfigisarpagut, taamatullu suliaqarnerput maanna inerititaqarfiuvoq. Peqatigitillugu erseqqissaatigerusuppara, aningaasaliisuvut Namminersorlutik Oqartussallu ikiuussimanngitsuuppata taama kusanartigisunik angusarsimanaviarnata, Elite Sport Greenlandimi siulittaasoq Finn Meinel oqarpoq.

Kikkut ukiumi nutaami pikkorivissutut tapiiffigineqassanersut Elite Sportip ullumi avammut saqqummiuppaa. Tapiissutinik pissarsisut ilagaat ujakkaartartut Martin Møller, Niviaq Chemnitz Berthelsen aamma Karl-Peter Kristensen, taakkulu tamarmik VM-imut Val di Fiemmemi ingerlanneqartussamut anngunnissaminnut periarfissaqarput.

Pikkorivissunut tapiissutinik pissarsisut tassaapput:

  • Karl-Peter Kristensen (Ujakkaartartoq)
  • Niviaq Ch. Berthelsen (Ujakkaartartoq)
  • Martin Møller (Ujakkaartartoq)
  • Lauritz Heilmann (Taekwon-Dortartoq)
  • Johan Peter Halsøe (Taekwon-Dortartoq)
  • Hans Jakob Brandt (Sisoraatinik freestylertartoq)
  • Liza Tuperna Itzacky (Atletikkertartoq) 
  • Max Petersen (Paraglidertartoq)

Piginnaanilinnut tapiissutinik pissarsisut tassaapput:

  • Malik Holm (Sisoraatinik sangusaarsartoq)
  • Rasmus Nielsen (Snowboardertartoq)
  • Mathias Mark (Snowboardertartoq)
  • Malik Berthelsen (Sisoraatinik freestylertartoq)
  • Emil Brandt Olsen (Sisoraatinik freestylertartoq)