OL-imut ikumatitaq siullerpaamik issittumi nunanik aqqusaagaqassaaq
Nunavummi illoqarfiit pingasut tassaasut Iqaluit, Qorlortoq aamma Qaasuitsoq aappaagu novembarimi OL-ip ikumatitaanit tikeraarneqassapput, tamanna Nunavummi illoqarfinni pioneqartuni nuannaarutigineqaqaaq.
- Tamanna pissanngatigeqaarput, Iqalunni borgmesteri Elisapee Sheutiapik oqarpoq, taassuma naatsorsuutigaa illoqarfimmi timersortartut inuusuttut OL-imut ikumatitaq illoqarfikkut arpaliussinnaajumaaraat. Aamma Qaasuitsumi ikumatitamit aqqusaarneqarnissartik tulluussimaarutigeqaat:
- Nunaqarfitta 240-uinnarnik innuttaqartup taamatut misigisaqarfiunissaa nuannaarutigeqaarput, Duncan Walker Qaasuitsumeersoq oqarpoq. Taanna aamma isumaqarpoq tamanna inuusuttut timersorusunnerulernerannik kinguneqarumaartoq.
Vancouverimi ukiuunerani OL-eqarnissaanik aaqqissuisut ikumatitap Nunavummik aqqusaarsinissaa siunertaqarlutik aalajangersimavaat:
- OL pillugu isumaliortaatsip inuiannit assigiinngitsunit sapinngisamik amerlanerpaanit ilisimaneqalernissaa pingaartutut isigigatsigu. Taamaattumik Issittup aqqusaarnissaa aalajangiupparput, Jim Richards Vancouverimi OL komitemeersoq Northern News Servicemut oqarpoq.