Nunatsinni sisorartartut kattuffiata siulittaasuata tulliata Klaus Møllerip ilimaginngilaa Martin Møllerip OL-imut peqataasinnaanissaa.
Danskit inatsisartuinut ilaasortap Lars-Emil Johansenip Siumumeersup, danskit kultureqarnermut ministerianut Brian Mikkelsen-imut saaffiginnissutaa kinguneqarsinnaanerattaaq nalornissutigineqarpoq.
Siunissamili nunarput sinnerlugu OL-imut peqataasalersussat toqqarneqartalernissaanni peqataasinnaalissagunarpoq – danskit piumasaqaataat avaqqullugit.
Ippassaq Lars-Emil Johansen Klaus Møllerilu periarfissanik ingerlariaqqiffiusinnaasunik eqqartueqatigiipput. Eqqartorneqartut ilagaat atsiortitsinerit iluaqutaasinnaaneri.
Martin Møllerilli OL-imut peqataasinnaanera qularnarpoq. Tassungali tunngasoq suliaq siunissami peqataasalersussanut iluaqutinngorumaarsimavoq.