OL-imi ikumatitaq Parismi perulluliuutaavoq

Olympiadeqarnissaata tungaanut ikumatitap ingerlanneqartup Parisimukaanneqarnerani perulluliortoqaqattaarmat politiinit tigusarineqartut arlaqarput. Aqqutigineqartumi Kinap Tibetimi inuit pisinnaatitaaffiinik unioqqutitsiuarneranik akerliussutsimik takutitsisut, allagartarsuarnik nassartut malinnaapput.
Allattoq Najaaraq Egede
apriilip 07-at 2008 17:08

Ikumatitaq isumannaallisaasunit sisamariarluni qaminneqariarluni Parisip aqquserngisigut bussinik ingerlanneqartarpoq.

Akerliussutsimik takutitsisut Tibetip erfalasuanik nassartut amerlavallaaqimmata, Eiffelip napasuliarsuanit ikumatitaq aallarunneqaannartoq isumannaallisaasut qamippaat, kingornalu ikumatitaq aallarunneqaqqikkaluarmat aamma akerliussutsimik takutitsisut akulloqqussinnaannginnamikkit ikumatitaq qameqqittariaqarpaat.

Ippassaq Tuluit illoqarfiisa pingaarnersaatigut ikumatitaq ingerlanneqarmat akerliussutsimik takutitsisut ikumatitamik tigusingajammata Frankrigemi pisortat isumannaallisaalluarsimagaluarput. Ippassaq Londonimi pisut Kinami pisortanit Tibetimiut namminersulerniat ikittuinnaat piliaattut ajorluinnartutut oqaatigaat.

Olympiadeqartarneranut isumalioqatigiissitami siulittaasup ullumi oqaatigaa Tibetimi pisut isumakulunnartillugit, ajornartorsiutillu eqqissisimasumik qaangerniarneqarnissaa neriuutigalugu. Nunanit tamanit avoqqaarinninneq Beijingimi isumalioqatigiissitap ullumi ataatsimiinnerani oqaaseqarfigineqarpoq.

Pingasunngorpat ikumatitaq Amerikap kitaani illoqarfimmut, San Franciscomut tikiunneqarpat aamma akerliussutsimik takutitsisoqarnissaa ilimagineqarluinnarpoq.

Ikumatitap Beijingimut, aggustip arfineq-pingajuani tikiunneqarnissaata tungaanut nunat assigiinngitsut 26-t aqqusaarlugit suli ingerlanneqartusaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq