OL-eqarnissaanut ikumatitaq Beijingimut ullumi aallarunneqarpoq

OL-eqarnissaanut ikumatitap Beijingimut ullumi aallarunneqarnera persuarsiutigineqarpoq. Arpattut paarlakaallutik ikumatitaq Beijingip tungaanut ulluni tulliuttuni pingasuni ingerlatissavaat. Kina-mi pisortat nakkutilleeqqissaaraluartut akerliussutsimik takutitsisoqallattaavoq.
aggustip 06-at 2008 12:20

Tusarparput Ian Thum, taanna allat pingasut ilagalugit Olympiademi unammijuaarfissap eqqaani, tibetimiut erfalasuat allagartarsuarlu nittarsaallugit napparummut qaqisimapput. Allagartarsuarmi allassimavoq; Silarsuaq ataaseq, sinnattugaq ataaseq, Tibeti aniguisinneqarli. Akerliussutsimik takutitsisut oqarput, Kina-miut namminneq Olympiadernerit politikkikkut atorniarsarigaat, ikumatitarmi Tibetikkoortinneqarmat Kina-miut aqutsisuutitaata Kinap erfalasua tigullugu oqarpoq, Kinap erfalasua naassaanngitsumik Tibetimi erfalatinneqartuassasoq. Akerliussutsimik takutitsisut, ilisimatusartut Tibetip aniguisitaanissaanik siunertallit suleqatigiiffianneersut, pisortat tusagassiorfiat naapertorlugu, minutsini aqqaneq marluinnarni nittarsaatereersut politiinit aqqartinneqarput, akerliusunulli tapersersuisut oqaatigaat, nalunaaquttap akunnerani ataatsimi napparussuarmi nittarsaassimasut. Illoqarfimmi aamma inuit kikkuunersut akunnittarfiit ilaanni inini marlunni naalakkersuisunut illuatungiliuttut paarnaarunneqarsimasut aqqi allattorsimavaat, inuinnaat, taakkualu politikkikkut isummatik naapertorlugit pisinnaatitaaffii, pillugit, Naalagaaffiillu Peqatigiit isumaqatigiissutaannik Kina atsioqataaqqullugu piumasaqarlutik. Akunnittarfimmi init iigaanni inuit allattuisimasut tusagassiortut nunanit killerneersut kalerreriarlugit qimaasimapput.