Oktobarimi illoqarfinni pingasuni nipilersortitsisoqassaaq

Nuummi Sisimiuni Ilulissanilu nipilersortitsilluni festivalit ukiut tamaasa ingerlanneqartartussat illoqarfinni taakkunani innuttaasut qilanaarisinnaanngorpaat.
Allattoq Elisa Isaksen
septembarip 04-at 2009 09:23

Sisimiuni Ilulissanilu Kulturikkut illorsuit nipilersukkanik saqqummersitsisarfik Atlantic Music Nuummiittoq suleqatigiinnissamik isumaqatigiissuteqarfigalugu, festivaleqartitsisarnissamik nutaamik aallartitsilerput taasaminnik Akisuanerit. Taakkulu oktobarip aappaanni pingajuannilu illoqarfinni pingasuusuni ataatsikkut ingerlanneqassapput. Festivalit ingerlaneranni nipilersortartoqatigiit ataatsit ikinnerpaamik illoqarfinni marlunni nipilersorsinnaanissaat pilersaarutaavoq.

Aningaasaliisut pingaarnerit tassaapput Air Greenland aamma Branding Greenland. Festivaalimi nutaami nipilersortartut tusarnaartulerlutik nipilersornissaat pingaarnertut siunertarineqarpoq, peqatigisaanillu kalaallit nipilersortartuisa nunarsuamioqatitsinnut nittarsaannissaat, aviisiliortut nipilersornermik allaaserinnittartut nunani allamiut qaaqqunerisigut. Illoqarfiit pingasut festivalernerini nipilersortartut Nunatsinneersut - tusaamasaanerit tusaamasaannginnerillu - nipilersortinneqartassapput.

Festivaalit qanoq ingerlanneqarnissaannik programmi suliarineqartoq qanittukkut avammut saqqummiunneqassasoq tusagassiuutinut nalunaarummi oqaatigineqarpoq.