Amerikamiutut arsaannermi siornatigut nuannarineqarluartoq, O.J. Simpson sakkulersorluni tillinniarsimasutut, perullulioqatigiinnermut peqataasimasutut aamma sakkumik toqutsissutaasinnaasumik sakkoqarluni saassussisimasutut ukiuni 15-ini parnaarussaasussanngorlugu ullumikkut eqqartuunneqarpoq.
Simpson nunarsuaq tamakkerlugu tusaamaneqalerpoq, tupaallaatigineqaqisumik Los Angelesimi nuliaminik taassumalu ikinngutaanik toqutsinermut pinngitsuutitaagami.
Ullumili pineqaatissinneqarnerani ilaatigut pineqarpoq, 2007-imi Las Vegasimi saassussineq, tassani Simpsonip allamik aappaqarluni angutit marluk timersornermi pokalinnattaanik tuniniaasut saassummatigik.