Odensemi kulturikkut unnussiuaarniarput

Odensimi kulturikkut ukiumoortumik unnussiuaartoqalerpat qeqertat Atlantikup Avannaaniittut pingasut, Savalimmiut, Islandip aamma Nunatta, tapersiillutik tunissutiginiagaat taaguuteqartinneqarpoq NORDATLANTISK KULTURNAT, Atlantikup Avannaamiut kulturikkut unnussiuaarnerat.
aggustip 25-at 2009 08:53

Odensimi kulturikkut unnussiuaarneq tallimanngornermi septembarip sisamaanni pissaaq. Odensimi Atlantikup Avannaamiut unnussiuaarneranni ukioq manna qulequtaassaaq "Atlantikup Avannaamiut takkutilerput", aaqqissuisullu oqariartuutiginiagaat tassaavoq, Savalimmiut, Nunatta Islandillu, ilusilersuinikkut, nipilersornikkut, qitinnikkut saqqummersitsinikkullu massakkorpiaq sumut killinnerat takutissallugu.

Oqariartuutiginiagaallu annikitsuinnaanngilaq. Aningaasarsiornikkut ajornartorsiorneq, politikkikkut uppititaanerit kulturikkullu ineriartornerit. Ineriartorneq allanngoriartornerlu taama sukkatigisoq malinnaavigissagaanni immikkorluinnaq eqqarsariaaseqarnissaq pisariaqarpoq, aamma kulturi nagguiillu, tassa siuaasat, pigiinnarniaraanni.

Atlantikup Avannaamiut kulturikkut unnussiuaarneranni qanganitsat nutaaliallu imminnut naapinnerat takutinneqassaaq, soorlu qeqertanit taakkunannga pingasuneersunik assinik saqqummersitsinikkut, ilutsit nutaat atisallu nutaaliat takuneqarsinnaassapput, inuiaqatigiit assuutaat kalaallisuullu aamma ilaatinneqassallutik.

Kalaallit inngeriaasiat nutaaq - taavalu Savalimmiormiut tasiorlutik qittattarnerat - alutorsaatigineqartussanut ilaapput.

Islandimiut rockimik nipilersortartut, Jónas Sigurdssonip nipilersortartui, erinarsortartorlu Nunatsinneersoq, Julie Berhelsen, aamma aliikkusersuissapput.

Kulturikkut unnussiuaarneq tallimanngornermi septembarip sisamaanni ualikkut kingusissukkut nalunaaqutaq arfinernut aallartissaaq.