Odensemi Illu Atlantiku piviusunngortinneqariaannanngulerpoq

Odensemi umiarsualivik umiarsualiviup ilaanik 2000 kvadratmeterimik 1 millionit koruuninik akiliisitsilluni tunisaqarnissaanut Odensemi kommunalbestyrelsimit akuerineqaqqammerpoq.

Atlantikup avannaamiunut illuliornissamut 20 millionit koruunit kommunalbestyrelsip akuersissutigereerpai. Taamaattorli illuliortitsinissamut aqutsisut takorlugaat piviusunngortinneqassappata, aningaasaliissutit naammanngillat.

- Illu Odensep umiarsualiviani takoqqusaarutitut inissisimassaaq, Konservativit byrådimi ilaasortaatitaat Steen Møller sanaartornermi aqutsisussani siulittaasumut tulliusoq oqarpoq.

- Upernarneruppat suliniut tamakkiinerusoq saqqummiutissavarput. Sumiinnissaa maanna aalajangiunneqareerpoq, Odensellu Kommuniata sanaartornissamut pilersaarutaani ilanngunneqassalluni. Tamakku inissinneqareerpata kommunip aningaasaliinerata ilassutissaanik aningaasaateqarfinnut assigisaannullu qinnuteqaateqarsinnaalissaagut, Steen Møller aviisimut Fyens Stiftstidendemut oqarpoq.

Pilersaarut piviusunngortussanngorpat, kalaallit illuat Hunderupvejimiittoq tunineqassaaq taamalu suliniutip aningaasalersorneranut tapertarineqassalluni. Sanaartornermik aqutsisut aamma neriuutigaat Kalaallit Nunaannit, Islandimit Savalimmiunillu aningaasatigut tapiisoqarumaartoq.

- Islandimi aningaasarsiornerup ajalusuunngitsiarnerani 1 millionit koruuninik tapiiffigineqarpugut, Steen Møller oqarpoq, taassumali illup ilinniartunit nunanit Atlantikup avannaaneersunit aamma najugaqarfiusussap qanorpiaq akeqarnissaa maanna oqaatigisinnaannginnerarpaa.

Pilersaarutit pissusissamissut ingerlassappata, illup 2013-imi atulernissaa pilersaarutigineqarpoq.