Odense-mi Atlantikumiut illorsuassaat ima isikkoqarpoq
Illussamik titartaasut tassaapput Isager Arkitekter Cornelius + Vöge suleqatigalugu ajugaasuusut. Illorsuassamik suliarinnittuussapput Hans Jørgensen & Søn, Grontmij og Carl Bro Ingeniøritut nakkutilliisussanngortut. Nunaminertap ilusissaanik Masu Planning titartaasuussaaq.
Illussanik titartaasartut Atlantikup avannaani illulioriaaseq isumassarsiorfigisimavaat. Illorsuaq arlalinnik sukaqassaaq arlalitsigullu Atlantikup avannaani qaarsortarasaarnera ersersinniarneqarluni. Illorsuup qalia Savalimmiormiut qalialioriaasiat atorlugu suliaavoq. Atortussallu ilaat Atlantikup avannaaniit tikisinneqassapput qaarsoq nunatsinniit islandimiullu qissiaataat tikisinneqassammata.
Sanaartortussanik toqqaaniarnermi neqeroortut 26-upput taakkunanngalu tallimat akornanni ataaseq naggataatigut toqqarneqarpoq. Pingasut kingulliit Odense-mi umiarsualivimmi saqqummersinneqarput takoqqusaarusiortartut allaffeqarfianni Atlantikup avannaamiut illorsuassaata akinnguani allaffeqartumi.
Unammisitsinermi ajugaasut nalunaarutigineranni najuuttut 70-upput Odensep kommuuniani rådmandi aamma Atlantikup avannaamiut illorsuassaanni siulersuisut siulittaasuat Steen Møller aqutsisuulluni. Rasmus Lyberth erinarsoriaqquneqarsimavoq. Periarfissarlu iluatsillugu oqaluttuara nuliani Annette Lyberth Kalaallit Illuutaanni paarlattaasoq. Illorsualiornissaminngooq suliaq ukiut tallimat matuma siorna aallartimmalli taanna angerlarsimarpiarsimanngilaq. Taamaammat ullumikkut assut nuannaarnerarpoq.
Cornelius + Vöge Masu Planning peqatigalugu 2010-mi ajugaasuupput Odense Kommunep suliaq Byens Ø pillugu unammisitsisoqarmat Atlantikullu avannaamiut illorsuassaat tassani inissisimasussanngorpoq.
