Obamap sorsunnerit siulliullugit samminiarpai

USA-mi præsidentinngorlaap ullormut oqaluuserisassatut siullertut, Irakimi Afghanistanimilu sorsunnerit sammivai.
Allattoq Jaaku Lyberth
januaarip 21-at 2009 17:06

Barack Obamap qineqqusaarnermini uteqattaarlugu oqaatigiuakkani, tassa Irakimi sorsunnerup piaarnerpaamik unitsinneqarnissaa, ullumi sulileqqaarnermini, illersornissamut oqartussat qullersaat sillimaniarnermullu ataatsimiititaliaq neriorsuumminik piviusunngortitsiniarluni ataatsimeeqatigai.

Illersornissamut qullersaqarfimmi pisortaq, ullumi ataatsimeeqataasoq, admiral Mike Mullen, siornatigut sakkutuunik Irakimiittunik 140.000-nik angerlartitsinissamut ullulersuerusunnani oqartaraluartoq ullumi sallaannerungaarluni oqarpoq, Obamap oqaasii naapertorlugit akisussaassusilimmik sakkutuut ingerlakaatinneqartussaammata, suliassartik naammassineqarsinnaassasoq.

Obamammi qineqqusaarnermini sakkutuut Irakimiittut qaammatit 16-it ingerlaneranni angerlakaatinnissaat siunertaralugu oqaatigisareerpaa. Irakimi naalakersuisut aamma USA-miit siunertat nutaat tunaartaralugit ingerlaqqittariaqalerlutik nassuerutigalugu, naalakersuisut oqaaseqartartuata ullumi oqaatigaa, Buship naalakkersuisuutitaalu juullinngitsiartoq isumaqatigiissutigigaluakkamik allanngortinneqarnissaat akuerisinnaallugu, amerikamiullu sakkutuuisa 2011-utinnagu angerlakaatereersimanissaat peqataaffigisinnaallugu.

Afghanistanimili sorsunnermut atatillugu Illersornissamut qullersaqarfimmi pisortap Obama isumaqatigilluinnarlugu oqarpoq, Afghanistanimi sorsunnermi ajugaassagunik sakkutuut amerlisariaqartut. Taamaalilluni Afghanistanimi amerikamiut sakkutuuisa 30.000-iusut 60.000-inut amerlaneqarnissaat ilimanarsivoq.