Obamap siunnersortai: Issittumi uuliasiorneq unitsilli
Præsidentip siunersortai marluk, Carol Browner aamma John Podesta, nutaarsiassaqartitsiviup, Bloomberg View-ip nittartagaani pingaarnertut allaaserisaminni allapput, isumaqarlutik issittumi uuliasiorluni qillerinerit tamarmik isumannaatsumik ingerlanneqarsinnaanngitsut.
Taama siunnersuuteqarneq Shellimut kingunerluttussaassagunarpoq, tassami taakku aningaasat 28 milliard koruunit missaanniitut atorlugit, issittumi uuliamik gassimillu ukiuni kingullerni arfinilinni ujaasipput.
Piffissami kingullermi sivitsulersumilu, Shellip qillerutaasa atortuinik ajutooqattarnerit aamma isumannaallisaanermik avatangiisillu eqqarsaatigalugit ajutuunnginnissamut atortut aserukulalerneri pissutigalugit, Obamap allattoqarfiata Shellip issittumi pilersaarutai misissulerpai, tamanna uani qaammammi aallartippoq.
Issittumi uuliamik ujarlerluni qillerinerit ulorianarpallaarneri ilisimatuunit, aningaaserivinnit, sillimmasiisarfinnit aamma uuliasioqatigiinnit unammillertunit oqaatigineqartarneri, Obamap siunnersortaannit erseqqissaatigineqarpoq.
Issittumi Shellip qillerilluni ulorianartorsiornera ukiutoqqami kingullermik pivoq, tassa qillerussuaq Kulluk anorersuarnerani tissukarluni ikkarlimmat, ajutoortoqarujussuartitsingajavillunilu.
Shell ukioq mannamut akuersissummik Obama-p allattoqarfianit tunineqartariaqanngikkaluartoq, Obamap siunnersortaanit erseqqissaatigineqarpoq.
- Issittumilu silap sakkortunerujussua sumillu tamanit ungasinnera eqqarsaatigalugu, uuliasiorniarlutik pilersaaruteqartut tamarmik unitsinneqartariaqarput, siunnersortit Browner amma Podesta isummersorput.
