Obamap qinigassanngortinneqarnini qujassutigaa

George W. Buship ukiut kingulliit arfineq-pingasut politikkerisimasaa kukkuluttortutut nalilerpaa, USA-milu innuttaasut tamarmik kattullutik nunap iluani pissutsinik aaqqiiniarnissaat kajumissaarlugit.

Republikanerit qinigassanngortitaat John McCain sakkortuumik saassunneqarpoq, politikkip ukiuni kingullerni ingerlanneqarsimasup taassuma nangiinnarniaraa oqaatigalugu.

Ilaqutariit sulisartut akileraartarnikkut oqilisaavigineqarnissaat Obamap ujartorpaa, suliffeqarfissuillu suliffinnik nunanut allanut nuussisartut akileraartarnikkut oqilisaavigineqartarnerat illuatungilerlugu.

USA-p uuliamik Kangia Qiterlermeersumik isumalluuteqarunnaarluni avatangiisinut mingutsitsinngitsunik nukissiuuteqalernissaa ujartorpaa, aningaasallu tamatumunnga atugassat 760 milliardi koruunit missaat pisariaqartinneqarsoralugit.

Suliffeqarfiit tassuunatigut pilersinneqarsinnaanissaat neriuutigineqarpoq.

Atuarfeqarfinni pitsanngorsaaniartoqarnissaa Obamap oqariartuutigaa, ilinniartitsisut amerlanerusut akisssarsiagissaarnerusullu atorfinitsinneqarnissaat Obamap ujartorpaa.

Peqqinnissaqarfinnilu pitsanngorsaasoqarnissaa aamma oqariartuutigineqarpoq.