Obamap pilersaarutaa immaqa angumersisinnaanngilaq
Tamanna sapiiserluni taasinerusoq nalunngilara, Obama oqarpoq, peqqinnissakkut napparsimalernissamullu sillimmasertittarnikkut nutaamik pilersaarut Repræsentanternes Husimut anngummat. 220-t 215-inut, annikikkaluaqaaq, kisiannili ajugaaneq ajugaaneruvoq. Maanna inatsit Senatimut ingerlateqqinneqassaaq taavalu arfininngormat sapaatiummallu nuannanneq qaangiukkiartulerluni. Repræsentanternes Husimi ajornakusoorunneqassaguni Senatimi suli ajornakusoorunneqarnerussaaq. Obamap taasinernit 100-nit 60-it atussavai, Senatimili ilaasortat imminnuinnaq eqqarsaatigipput, taakkualu aalajangiusimasaat Obamalluunniit allaat allanngortissinnaanagit. Naalagaaffiup aningaasaataasa naartuersittarnernut atorneqarnissaat akerleriissutaassaaq. Republikanerit Demokratillu konservativiusut tamatumunnga akerliupput. Tamakkua aningaasalersornissaannut Repræsentanternes Husimi ilusiliussamik suliaqarput pisuut akileraarusiiffigineqarnissaat ilanngullugu. Assersuutigalugu Senatip pisuut napparsimalernissamut sillimmasertittarnissaat akileraarusiiffiginiarpaa, minnerunngitsumik naalagaaffimmut tunngasortaani. Naalagaaffiit tamarmik immikkut naalagaaffiup napparsimalernissamut sillimmasertittarfianit namminermit ilaajunnaartarnissaat Senatimi sulissutigineqarpoq. Siornatigulli præsidentip tullissaatut qineqqusaartup Obamamullu akerliusup John Liebermannip nalunaarutigereerpaa napparsimalernissamut sillimmasertittarnerup naalagaaffimmut tunngasortaa qanorluunniit iliorluni pinngitsoortinniassallugu, taamaalillunilu inatsit pilersissinnaajunnaarlugu. Taanna peqataanngippat taasinerit 60-it suminngaanniissasut ilisimaneqanngilaq.
Obamap Senatorit allannguinissamut angeqqullugit ippassaq unnukku pinngitsaalivai. Annilaangasaarinermi pineqarpoq suliamik ingerlatsineq taanna ukiortaamut kinguarsarneqarmat.
