Obamap oqalugiaataa assigiinngitsunik isumaqarfigineqarpoq

Obamap Cairomi oqalugiaataa, pissangassutigineqaqaluni utaqqineqarsimasoq Arabiamiunit assigiinngitsunik nalilerneqarpoq. Oqalugiaalli USA-p Arabiamiullu akornanni aaqqiagiinngittarnerinik qaangiiniarneruvoq.
juunip 04-at 2009 14:26

Obama Cairomi oqalugiarnermini ilaatigut oqarpoq, USA-p nunarsuatsinnilu muslimit akornanni akaareqatigiilluni suleqatigiilernissaq aallarnisarniarlugu Cairomut oqalugiariartorluni. Suleqatigiilernissamilu tassani soqutigisaqaqatigiinneq ataqqeqatigiinnerlu tunngavigisassatut takorloorlugit.

Obamap Palæstinamiut peqqarniisaarunnaaqqullugit kaammattorpai, kiisalu Israelimiut Palæstinamiullu immikkut naalagaaffeqalernissaat pisariaqarluinnartoq naqissuserlugu. Obamap ilanngullugu oqaatigaa USA qaquguluunniit islamisiortunut sorsulernavianngitsoq, peqqarniisaarniartulli tamarmik akiorneqartuassasut.

Taakkua saniatigut upperisaq aallaavigalugu immikkoortinneqannginnissaq, arnat angutillu naligiissitaanerat, arnat pisinnaatitaafii kiisalu nunarsuatsinni aningaasaqarniarnikkut ajornartorsiorneq Obamap oqalugiaatigereermagit tusarnaartut tamarmik nikutserlutik ersaattaapput.

Kangia-qiterlermi pissutsinut immikkut ilisimasalik, Peter Seeberg oqarpoq, Obamap oqalugiaataa USA-p muslimillu naalagaaffiisa akornanni pissutsinut iluaqutaajumaartoq neriuutigalugu. Alaatsinaattut ilaatigut tupaallaatigaat arnat naqisimaneqarnerat Obamap ammasumik saqqummiummagu, taamaalillunili muslimit ingasaassiniartuunngitsut qanillattorlugit suleqatiserinerattut tamanna isigineqarpoq.

Obamami muslimit akornanni kingusinnerusukkut isumaqatiginiaqatigisarsinnaasaminik ujartuivoq, muslimeqarfinni, soorlu Pakistanimi, Afghanistanimi Irakimilu perulluliortoqartuartillugu tamanna pisariaqarmat. Kangia-qiterlermi eqqissineqarnissaa anguniarlugu suliniutit aallartisaqqinnissaannut tunngavilersuinngikkaluartoq, Obamap oqalugiaataa Palæstinamiut siuttuinit iluarisimaarneqarpoq. Obamap oqalugiarnera nunarsuarput tamakkerlugu TV-kkut aallakaatinneqarmat naatsorsuutigineqarpoq muslimit 1 milliardit missaaniittut isiginnaarsimassagaat.