Obamap nunap inoqqaavi taperserpai
Nunat inoqqaavisa nunaminnik aqutsinissamut atuinissamullu pisinnaatitaaffii aammalu oqaatsiminnik kulturiminnillu ingerlatsisinnaanermut pisinnaatitaaffii USAp præsidentianit Barack Obama-mit taperserneqarput.
Taama USAp præsidentia nalunaarpoq sisamanngorneq decemberip 16-iat USAmi nunap inoqqaavi kimigiisereersut pisinnaatitaaffimmik akuerineqarnissaat pillugu.
Nunat inoqqaavisa pisinnaatitaaffii pillugit nalunaarut 2007-imi FNimi akuersissutigineqarpoq. Naalagaaffissuilli USAtut ittut akuersaarnissartik tunuarsimaarfigisimavaat nunat inoqqaavisa nunamut piginnittussaanermik noqqaalernissaat aarleqqutigalugu.
Canada akuersaarnissaminut aamma tunuarsimaarsimagaluartoq qaammat kingulleq akuersaarnerminik nalunaaruteqarpoq. Maannalu USAp akuersaalernera Inuit suliniaqatigiiffiata ICCp assut nuannaarutigaa.
- Nunat tamalaat akornanni suleqatigiinnermi soorlu Issittormiut Siunnersuisoqatigiiffianni nunat inoqqaavisa kattuffiisa peqataasut naalagaaffinnik suleqateqarnerminni qularnanngitsumik nukittorsaatigissavaat, taama ICCp præsidentia Aqqaluk Lynge oqarpoq.
- Tunngaviusumik inuttut pisinnaatitaaffitta akuerineqarnissat pillugu ilungersuuteqarnermi angusaq imaannaanngitsuuvoq.
Aqqaluk Lynge oqarpoq.
Nutaarsiassaqartitsivik AFP naapertorlugu nunarsuatsinni nunat inoqqaavi 370 millionit nunanut assigiinngitsunut agguataarsimapput.
