Obamap Norgemiinnera sivikitsuinnaavoq
Soorliuna taama ulapitsigisoq? Tassami Obamap aaqqissuussinerit arlallit itigartippai, ilaatigut Norgep kunngianik Haraldimik ullaakkorsioqateqarnissaq. Ministeriuneq Stoltenberg nalunaaquttap akunnerata affaani præsidentimiippoq, taamaallaallu tusagassiortunik katersortitsinermut apeqquteqarfiusinnaasumut ataasiinnarmut inissaqarluni.
- Eqqissineqarnissaanik suliniuteqartunut nersornaasiuttakkap tamatuma imatorsuaq persuarsiutigineqarnissaa kissaatiginngilaa. USA-mi timmissatut kissavittut saqqummerusunneruvoq, ajornakusoortunillu aalajangiisarluni, soorlu Afghanistan pineqartillugu, tuitut eqqissinerup ilisarnaataatulli Amerikamiut nuannarilluagaattut.
Barack Obamap eqqissineqarnissaanik suliniuteqartunut nersornaatisineranut tunngavigineqarpoq nunani tamalaani isumaqatiginninniariaaseq pitsaanerulersissimammagu, nunanilu tamalaani takorluukkat nutaat pilersillugit.
Nobelimik nersornaatisisitsisarnermut komitép Obamamik toqqaasoqarsimanera isornartorsiungaatsiarpaa - ingammillu Amerikamiut Afghanistanimi suliniutiminnik annertusaareernerisa kingornagut.
Nobelip eqqissineqarnissaanik suliniuteqartunut nersornaasiuttagaanik pissarsereerluni Obama Oslop Rådhusiani oqalugiarpoq, Afghanistanimilu sorsunnikkut iliuuseqarnini illersorlugit.
Ilaatigut oqarpoq pissaanermik atuinissaq ilaanneeriarluni pissusissamisoortuusartoq, isumaqatigiissitsiniarnerillu al Qaedakkunnik sakkulersortitsiunnaarnavianngitsut.
Naggueqatigiit Inuit Canadameersut Alaskameersullu Københavnimi Amerikamiut aallartitaqarfiata sioraatungaani aamma ullaap tungaa akerliussutsimik takutitsipput. Naggueqatigiit Inuit isumaqarput eqqissineqarnissaanik suliniuteqartunut nersornaat tunniunneqarsinnaanngitsoq Amerikap avannarpiaani najugaqartunut silamut pinngortitallu imminut paarineranut tunngasut ileqqorissaartumik isumagineqaqqaarsimanngippata.
