Obamap nersornaaserneqarnissaa assortuussutaasimavoq
Nobelip Eqqissinermut Nersornaasiuttagaa USA-p præsidentianut, Barack Obamamut, sapaatip akunnerani kingullermi tunniunneqarmat tupaallaataasorujussuuvoq. Maanna paasineqarpoq, nersornaat ilumut tassunga tunniunneqassanersoq isumaqatigiinngissutaasimasoq.
oktobarip 15-at 2009 10:37
Nersornaasiisartut ataatsimiititaliaanni ilaasortat pingasut, tassa amerlanerussuteqartut, Barack Obamap nersornaatisinissaanut akerliusimapput. Tunngavilersuutigaat Obamap qanoq piginnaaneqartiginermi takutinnissaanut suli amigaateqarnera.
Aviisimi allaaserineqartoq naapertorlugu ataatsimiititaliap siulittaasortaavata, Norgimi ministeriunerusimasup, Thorbjørn Jaglandip, Socialdemokratiusup, parteeqataatalu Sissel Rønbeckip uteriisissutigisimavaat nersornaat USA-p præsidentianut tunniunneqassasoq.
Nersornaatilli USA-p præsidentianut tunniunneqarnissaa ataatsimiititaliami ilaasortat tamarmiullutik naggataagut isumaqatigiissutigaat. Norgemi aviisimi VG-mi tamanna allaaserineqarpoq.
