Obamap Mubarak oqaloqatigaa
Mubarak præsidentitut piaartumik tunuarnissaannik erseqqissumik kaammattuuteqanngikkaluarluni, politikkikkut ingerlatseriaatsimik piaartumik allannguinissamik piumasasqarfigivaa.
Politikkikkut ingerlatseriaatsimik allannguineq isumatooq eqqissisimasumik ingerlanneqartussaq maannakkkut aallartinneqartariaqartoq, Obama præsident Mubarakimut erseqqisaatigaa.
Nunap naalakkersuinikkut aaqqissuussaanerata allannguiffigineqarnissaanik aammalu tamat oqartussaaqaataanerata atuutsinneqarnissaanik piumasaqarlutik inuit million ataaseq qaangerlugu amerlatigisut, Kairo aqqanguserngani ippassaq unnukkut akerliussutsiminnik takutitsipput.
Præsident Mubarak tulliani præsidentimut qinersinissamut septembarimi pisussami qinigassanngortinniarani nalunaarpoq.
Inuppassuit akerliussutsimik takutitsisut pisinnaatitaafimminnik iluarsaaqqinnissamillu piumsaqarnerannik malinnigani, uukaaptitsinniarluni præsidentimut qinigissanngorteqqinniarani nalunaaruteqarpoq, illutungiliuttut siuttuat Muhamed ElBaradei nutaarsiassaqartitsivimmi CNN-imi apersorneqarluni oqarpoq.
Amerikamiut præsidentiat TV-ikkut oqalugiarami akerliussutsimik takutitsisunut oqalugiarpoq,
Egyptenimi innutaasut ingammik inuusuttut piumasaat tusaaniaratsigit tamanna erseqqissaatigissavara, qularutissaanngitsumik upperaara ilissinnut atugassarititaasut nammineerlusi aalajangissagassigit, præsident Obama tv-ikkut oqalugiarami taamatut oqarpoq.
