Obamap ivertinneqarnissaanut isumannaallisaarujussuarput
Politiit 8.000-t missaat Washingtonimi nakkutilliissapput, taavalu Secret Servicemi USA-milu naalagaaffiup isertortumik paasiniarsartuini, FBI-mi, sulisut Obamamik aamma nakkutilliissallutik. Sakkutuut 32.000-t piareersimassapput, soorluttaaq naalagaaffiup qulaani silaannaq paareqqissaarneqassasoq. Obama biilimut limousinamut qajannaallisakkamut ilaalluni tikiutissaaq, biili taanna qaartartunit aqquserngup sinaanut inissinneqarsimasinnaasunit allanillu sakkussianit kemikaliartaqarsinnaasunit pitarneqarsinnaanngilaq.
Inuppassuit præsidentip illorsuata USA-milu Kongresip eqqaani alapernaattussat, allallu 24.000-t missaanniittut, Obamap præsidentitut ivertinneqarnerani najuuttussat, tamaavimmik ataasiakkaarlutik misissorneqaqqissaassapput. Isiginnaartuuniaraannilu soorlu uumasut, cykilit, nammattakkat, taquaasiviit allallu sialummullu illersuutit, tassa paraplyt, nassaqqusaanngilluinnarput.
Obamap ivertinneqarnera KNR-TV-kkut nalunaaqutaq ullup qeqqaniit aallakaatinneqassaaq, uppernarsaaneralu uagut nalunaaqutarput malillugu nalunaaqutaq marlup missaani pissaaq.
