Obamap Aasiamut angalanera USA-mi suliffippassuarnik pilersitsinermik kinguneqassaaq

Præsidentit marluk nunarsuatsinni nunani pissaaneqarnerpaaneersut, maanna angalapput, taakkulu tamarmik nunaminni aningaasarsiornertik iliuuseqarfiginiarlugu angalallutik.
Allattoq Elisa Isaksen
novembarip 06-at 2010 16:18

USA-p præsidentia Barack Obama, nunanut Aasiamiittunut angalavoq, ullumilu Indiamut tikeraarnerani, Amerikamiut suliffeqarfiutaat, Indiap naalagaaffianut suliffeqarfinnullu allanut, 54 milliardit koruunit nalinginut isumaqatigiissuteqartut, avammut saqqummiunneqarpoq. Det Hvide Husimit oqaatigineqarpoq, isumaqatigiissutit kingunerannik, USA-mi ajornartoorfioqisumi, sullivinnik 50.000-inik pisariaqartinneqaqisunik pilersitsisoqassasoq.

Ilaatigut timmisartuliortitseqatigiiffik Boeing, isumaqatigiissutaagallartumik taaneqartumik, Indiami timmisartortitseqatigiiffimmut, timmisartunik assartuinermut atorneqartussanik qulinik, 4,1 milliardit dollarsinik nalilinnik isumaqatigiissuteqarpoq. Tamatumunnga peqatigitillugu timmisartortitseqatigiiffik Spicejet timmisartunik 33-nik Boeing 737-nik taaguutilinnik inniminniisimavoq.

Præsidenti alla nunaminit ungasissorsuarmut angalasoq tassaavoq Kinap præsidentia Hu Jintao. Taanna Europamut angalavoq, ilaatigut suliffeqarfiit Europamiittut Kinamiunut pisisartunut tunisassiornissaat siunertaralugu. Præsidenti, naalakkersuisunut ilaasortanik arlalinnik, suliffeqarfissuillu pisortaannik 50-it missaanniittunik ilaqarluni ullumi Portugalimiippoq.

Portugalimiut aningaasarsiornikkut sanngiitsumik inissisimasut, nunaminnut iluaqutaasinnaasunik Kiinamiunik isumaqatigiissuteqarnissartik naatsorsuutigaat. Kiinamiummi Frankrigimi suliffeqarfinnut sapaatip akunnerani matumani siusinnerusukkut 110 milliardit koruunit nalinginut isumaqatigiissuteqareermata.