Obamamik toqutsinissamik pilersaarusiortut tigusarineqarput
USA-mi angutit marluk, demokratit præsidentimut qinigassanngortitaannik Barack Obamamik, toqutsinissamik pilersaaruteqarsimasutut politiinit tigusarineqarput. Toqutsinissaq taamaasilluni pinngitsoortinneqartoq USA-mi oqartussat nalunaarutigaat.
Allattoq Louise M. Kleemann
Pineqartut skinheadiupput, tassa ammip qalipaataa tunngavigalugu immikkoortitsiniartuullutik. USA-mi naalagaaffiit ilaanni Tennesseemi taartunik amillit 100-nit amerlanerusut aallaanngikkunnikkit niaquissamaarsimagaluarpaat, Barack Obamalu kingorna aallaallugu toqunniarsimagaluarlugu.
Sakkussanik tuniniaavik ujajaaffigeriarlugu atuarfimmik taartunik amilinnik amerlanerussuteqarfiusumik saassussinissartik angutit taakku marluk pilersaarutigisimagaluarpaat.
Obama sinnerlugu oqaaseqartartoq pisimasoq pillugu oqaaseqarusunngilaq, Obama maanna Pennsylvaniami qineqqusaaleruttorpoq.