Obama suli nuannarineqarluarpoq
Siumup siulittaasua Aleqa Hammond Naalagaaffiit Peqatigiit ukiumoortumik ataatsimiinneranni malinnaasutut maanna New Yorkimiippoq. Ullunilu kingullerni inatsisartunut ilassutissanik marlunnik qinersinerit New Yorkimilu borgmesterimut qinersineq, Obamap partianut ajorsarnerusut malinnaaffigalugit.
Aleqa Hammond siullermik aperaarput Amerikamiut præsidentiminnik nuannarinninnerat qanoq innersoq.
- Atorfilittat ambassadørillu oqaloqatiginerini malugisinnaavara Amerikamiut præsidentertaartik Barack Obama pitsaasorujussuarmik nalileraat aamma siunnerfeqarluartumik aqutsisuunera maluginiarneqartoq, Aleqa Hammond oqarpoq.
Obamap præsidentinngoramili apeqqutit oqimaatsut allallu imaaliallaannaq piviusunngortinneqarsinnaanngitsut aallartiortorsimasai maluginiarneqartut aamma oqaatigaa.
- Nutaamik aaqqissuussinerit piffissaq sivikikkaluaqisoq ingerlappai, annertoorujussuarmillu angusaqarsimasutut nalilerniarneqarpoq. Peqqinnissaqarnermut aaqqissuusseqqinneq Amerikami præsidentiusarsimasut siuliini iluatsittarsimanngitsoq iluatsilersutut isikkoqartoq innuttaasut aamma maluginiarpaat, nassuiaavoq.
Innuttaasut aqqusiniinnarmiittut oqaloqatiginerini qernertormiumik præsidenteqarnertik nuannarigaat maluginiarneqarpoq.
- Alutorsaatigalugu neriuuteqarfigisorujussuuaat. Præsidentip republikanerit demokratillu ataatsimoortissinnaavai ikinngutigiittullu oqaloqatigiissinnaalersillugit. Nutaamik eqqarsarneq ammaassisorlu eqqunneqarsimavoq, Aleqa Hammond oqarpoq.
Naallu Amerikamiut politikkimut soqutiginninnerat killeqarnerarlugu tv-qarfissuarnit nalilerneqartaraluartoq præsidentertik angusaqarnissaanut piffissalerusuppaat.
- Obama sukkasuumik sulivoq angusallu angisuut siusissukkut aallartillugit. Tamanna inuttaata nuannarineqaatigai, naliliivoq.
Aleqa Hammondip New Yorkimiinnermini allanngortoqangaarsimanngitsoq maluginiarpaa. Kisianni aningaasarsiornerup ajutoornerata arlalinni maluginiarneqarpoq, soorlu isiginnaartitsisarfissuit tusaamasat isaasukillisimallutik.
Taamaakkaluartoq præsidentertaaq nuannarineqarpoq.
- Barack Obamap nuannarineqarneranut pissutaavoq inuinnaat akornanni, soorlu neriniartarfinnut ornittagaanni neriartortarluni inooqataagami. Tamannalu ilaqutaasa siunnersortaasalu aamma malippaat. Obamap politikkia pivallaanngikkaluarlugu inuttut pissusilersortarnera nalilersorneqarnerusoq malugisinnaavara, Aleqa Hammond New Yorkimit ullumi taama oqarpoq.
