Obama siuariarpoq
Amerikami tv-qarfiit arlallit præsidentinngorniat oqallinnerat aallavigalugu qinersisartunik isumasiuititsipallapput, isumasiuinerullu tamatuma ersersippaa TV-qarfiit taakku tamarmik Obama ajugaasussatut suaarutigigaat.
Obamap taama siuariarnera nunarsuup sinnerata kissaatigisaanut eqquutitsissagaluarpoq, tassami ilaatigut Islandimiut pingasut qarasaasiami nittartagaliorsimapput, nittartakkami nunarsuarmiut kikkulluunniit præsidentinngorniarluni sassartoq sorleq piukkunneruneraat taaneqarsinnaatillugu.
Nittartakkamilu tassani maannamut taasisimapput nunani assigiinngitsuni 193-ineersut inuit 255.632-t, taakkulu amerlanersaasa Barack Obama taasimavaat, tassa taakkunannga Obamamut taasisut 87,3 procentiusimallutik.
Amerikamiullumi nittartakkamut tassunga aamma soqutiginnissimapput, taamalu Amerikamiut 80.328-t taaseqataasimapput taakkunannga 82,2 procentii Obamamut taasisimallutik.
