Obama qinersisartunut sunniuteqarsimaqaaq
Inuusuttut utoqqaanerulaartullu amerliartuinnartut qineqqusaarnermut peqaataasalerput, Obamap qinigaanissaa sulissutigigamikku.
Danmarks Radiomi tusagassiortoq Andreas Hall taama oqarpoq.
Inuusuttut suli qinersinikuunngitsut ilaat Barack Obamap qinigaanissaa ulapputigaat, illumiit illumut angalaarlutik demokratit novembarimi qinersiartornissaat qulakkeerusullugu.
Aamma utoqqaanerit taamaaliorput. Brenda Sykes, arnaq 59-inik ukiulik, inuutilluni præsidentimik suli qinersiartorsimanngilaq, maannali qinersiartussamaarluni.
Taassuma arnaa præsidentimik qinersiartortarsimanngimmat nammineq qinersiartortarsimanngilaq. Tallimanilli meeraqarpoq, qulingiluanillu ernutaqarluni. Taakku eqqarsaatigalugit maanna qinersiartussamaarpoq, tamat oqartussaaqataanerat pingaartillugu suliniuteqarnialerluni.
USA-mi præsidentissaq novembarip sisamaanni qinerneqassaaq.
