Obama præsidentitut ivertinneqaruni suliassarpassuaqassaaq
Obama præsidentitut aallartippat europamiut illersoqatigiinnissap tungaatigut tapersersortitut pisariaqarluinnartutut isigineqassasut ilimanarpoq. Obamali europamiunut sukkulluunniit atassuteqannginnami allanik piumasaqaateqartassagunarpoq. Soorlu Afghanistanimi sakkutuut amerlisikkusussavai, sakkutuullu akersuuttarnissaat akunnattoorfiginaviarnagu. Niueqatigiinnerup tungaatigut aamma allatut periuseqassagunarpoq, illuatungaatigullu europamiut USA-p aningaasaqarnerata nunanut allanut sunniuteqarnera aunneeqataafiginiassagaat ilimagineqarpoq. Obamalli killilersorneqarnissani nuannarinavianngilaa, USA-milu suliffissaqarniarneq pingaartinnerussagunarlugu. Naalagaaffiit ilaasa kisermaassillutik naalaakkersuisui aamma isumaqatiginiartalissavai Ruslandimullu pissutsit ilungersunartut iluarsiiffiginiassallugit. Aasiamili Kangianilu Qiterlermi naalagaaffiit aamma inussiarnisaarfiginiartussaassavai. Taamaammallu europamiut tapersersuinerat annertuumik pingaaruteqassalluni.
Unnuleraa Naalakkersuisut siulittaasuat Hans Enoksen præsidentinngortussamut pilluaqqussuteqarpoq.
- Qinersineq soqutigineqaqaluni nunatsinnit malinnaaffigineqarpoq isummersuinerillu qiimmaallannarpoq, soorlu USA-mut nunarsuattalu sinneranut aamma taamatut sunniuteqartoq. Siunissamut takorluukkatit neriulersitsinerillu avinngarusimasunit allaat tusaaniarneqarpoq.
Neriuppugut Kalaallit Nunaata USA-llu ataqatigiilluarnerat ingerlaanassasoq, ukiunilu kingullerni suleqatigiinnitta suli qajannaallisarnissaa qilanaaralutigu, Naalakkersuisut siulittaasuat, Hans Enoksen pilluaqqussummini taamatut allappoq.
