Obama: Nukissiuutit ataavartut marloriaatinngussapput

USA-mi præsidentinngortussap, Barack Obamap ullumi neriorsuutigaa, USA-p nukissiuutinik ataavartunik sanaartornini ukiuni tulliuttuni pingasuni marloriaatinngortissagaa.
Allattoq Elisa Isaksen
januaarip 08-at 2009 15:15

Tamanna pissalluni maanna USA-p aningaasarsiornikkut ilungersunartumik kinguaraluttuinnarneranut, Obamap annaassiniarluni pilersaarutaanut iliuusissanut atatillugu.

- Nukissiuutinik mingutsitsinngitsunik atuinermi aningaasarsiorneq kajumissaarniarlugu nukissiuutinik ataavartunik sanaartorneq, ukiuni tulliuttuni pingasuni marloriaatinngortinniarparput, Obama oqalugiarnermini oqarpoq, oqalugiaatiminilu aningaasarsiornikkut annaassiniarnermi iliuusissat, 4.000 milliardit koruuninik nalillit saqqummiullugit.

- Pisortat illorsuaataasa 75 procentii nutarterniarpavut aamma Amerikamiut angerlarsimaffiini 2 millioniusuni nukissiuutinik atuineq pitsanngorsaaviginiarparput, ilaatigut angerlarsimaffiit pitsaanerusumik oqorsaasersornerisigut, taamaalilluni atuisut akileraartartullu dollarinik milliardikkaanik kiassarnermut akiligassanik ileqqaarsinnaaniassammata, Obama oqarpoq.

Taassuma ilanngullugu oqaatigaa, ilaqutariit suliffillit ukiumut 5.500 koruunit missaannik akileraarutitigut oqilisaassiffigineqarnissaat neqeroorutiginiarlugu, atuineq annerulerniassammat.

Tamatumunnga peqatigitillugu Obamap neriorsuutigaa, aningaasarsiornikkut iliuusissamini suliffissaaleqisut aamma suliffissaaleqisut peqqinnissakkut ikiorserneqartarnerat annerulersinneqassasoq.