Obama nukissiuutinut ministerissaminik toqqaavoq
Nukissiuuteqarnermut ministerinngussaaq fysikimik ilisimatooq Nobelillu nersornaasiuttagaanik nersornaatisisimasoq, Steven Chu, ukiuni kingullerni sisamani ilisimatusarfimmi nukissioriaatsinik allanik ineriartortitsivimmi pisortaasimasoq. Taassuma Obamap avatangiisinut mingutsitsinnginnerusumik anguniagaqarluni suliffinnik nutaanik 2,5 millioninik pilersitsiniarnera piviusunngortissavaa kiisalu nukissioriaatsinik allanik ineriartortitsissalluni, soorlu karrinik assigisaannillu ikummateqarneq aamma nukinnik ataavartunik atuineq, soorlu anorimik, seqinermik aamma nunap kissarneranik atuineq.
Præsidentitut tunualersup George W. Buship ministerii atorfilittaalu, avatangiisinut nukissiornermullu akisussaasuusimasut, suliffeqarfinnit nukissiornermik imaluunniit aningaasarsiornermik ingerlataqartunit atorfinitsitaasuupput, Obamali allatut periuseqarluni toqqaaniartoq immikkut ilisimasallit naliliipput. Tassami taassuma oqaatigereerpaa, avatangiisit pillugit politikki suliarineqalerpat, nukissiuuteqarnermik suliaqartut sunniiniartartui akuutinneqassanngitsut.
Obama nutaarsiassaqartitsivimmut CNN-imut oqarpoq, USA-p uuliamik pinngitsuuisinnaannginnerata akiornissaa aamma nunarsuarmi silap kiatsikkiartornerata killilernissaa præsidentiunermini pingaarnerpaatillugit suliniarluni.
