Obama nersorsornaasiinermi imminut ajukkukkaluarpoq

Præsident Barack Obama Nobelip eqqissinissamut suliniuteqartunut Nobelip nersornaasiuttagaanik ullumi pisortatigoortumik tunineqarpoq. Tamanna pivoq sakkutuunik immikkut 30.000-inik Afghanistanimukartitsinissamik aalajangermalli sapaatip akunneri arlalialunnguit qaangiuttullu.
decembarip 10-at 2009 14:43

Pissaanermik atuinissaq ilaanneeriarluni pissusissamisoortuusartoq oqarpoq, nangillunilu:

-Sorsunnermi atortut eqqissineqaannarnissaa pillugu sorsunnermi inissisimapput, ilumoortorli tamanna uppernarsaatissamik allamik peqateqartariaqarluni, tassalu sorsunneq qanorluunniit pissusissamisoortigigaluaruniluunniit inuttut alianartunik kinguneqartarpoq, Obama oqarpoq.

Oqaasiilu DR-imi Steffen Gramip oqarnera malillugu USA-mi ilassilluarneqarsimapput. Tassami oqaaseqartartut ullaaq ullaakkorsiornerup kinguninnguagut aallakaatinneqarmata.

Obama imminut nikanartittutut ippoq oqarlunilu nersornaat allat pissarsiarigunikku pitsaanerugaluartoq, taavalu aamma soorlu ilissi tusarnaarissi, USA-p sorsunnermi inissisimanera pillugu aammalu nammineq naalakkiisussatut qullersaanerminik oqaluppoq nassuiaassillunilu USA Afghanistanimut sorsummat, pissutigalugu tamanna allaanerusinnaanngimmat, Obama oqarpoq nangillunilu:

Ajussuseq assersuutigalugu tassa Hitler sakkutuut pissaanerat atornagu ajugaaffigineqarsimanngisaannarmat, Al Qaedalu aamma taamatut ittoq. Tassa eqqissinissaq piumagaluaraanniluunniit sorsuttoqarsinnaavoq, taama nalunaaruteqarpoq.

Oqaaseqartartut arlallit sakkutuut pissaanerisa qaqugu atorneqarsinnaanissaat pillugu itisuumik isumaliutersuutai uniffigaat. Bush assigiinnanngilaa? Tassalu sakkutuut pissaanerannik atuiinnarneq, ilaat taama oqarpoq.

Taamaattorli sakkutuut pissaanerannik atuineq naapertuilluarninngortinniarlugu? Arlallillu maluginiarpaat præsidentitut kiserliortuusoq tunngavilersuutissaminik misissuilluartoq sakkutuut pissaanerannik atuinissamik illersuisutut assortuisutullu.