Isumaqatigiissutissaq Senatet-mi unittoorsimagaluarpoq republikanerit amerlanerussuteqartut siorasaarisimammata isumaqatigiissut akornuserniarlugu pingaarnermik Obamap suliai akornuserniarlugit.
- Naammaleqaaq, taama oqarput siornatigut republikanerit sinnerlugit USA-mi nunanut allanut ministeriusarsimasut.
Taakkua parteertik republikanerit partiiat USA-p sillimanissamut politikkianut akornusersuinerat amerlanerussuteqarniaannarlutik peqataaffigiumajunnaarpaat.
Præsident Obamammi Ruslandimut sakkukillisaanissamut annertuumut isumaqatigiissuteqarnissamut kongres-ip akuersinissaa kisiat amigaatigaa, taava USA-mi Ruslandimilu atominik sakkussiat amerlanerpaartaat peerneqassagaluarput.
Republikanerilli akuersinissamut nangaalersimapput, pingasunngormallu nalunaarutigaat sunannguarluunniit taaseqataaffiginiarnagu amerikamiut akileraarutitigut oqilisaavigineqartinnerat sivitsorneqanngippat.
Maannakkulli konservativit akunnerminnit saassunneqarput, tassami republinerit sinnerlugit USA-mi nunanut allanut ministeriusarsimasut, soorlu Henry Kissinger, George Schultz, Colin Powell allallu ataatsimoorlutik qinnutigaat republikanerit eqqarsaqqeqqullugit sakkukillisaanissamullu isumaqatigiissut akuereqqullugu.