Obama Kennedykkut illersorpaat
Ted Kennedy USA-mi præsidentiusimasup tusaamasarsuup John F. Kennedyp 1963-imi toqutaasup nukaraa – qanormitaava ilaqutariit Kennedykkut illersuinerat Obamamut sunniuteqarsinnaava?
Ilaqutariit Kennedykkut politikkikkut sunniuteqarnerpaat suli ilagimmatigit tapersersuinerat Obamamut pingaaruteqartupilussuussaaq. Kynnedyp sulisartut kattuffiinniit, qaqortumillu amiliniit tapersersorneqarnerulersissinnaavaa, minnerunngitsumillu aamma spaniamiusut oqaluttut akornannit tapersersorneqarnerulersissinnaallugu, kiisalu Kennedyp oqaasiinnakkut Obamamik tapersersuissamaannginnera qineqqusaarneranili angalaqatigalugu tapersersuinini takutissamaarmagu sunniuteqassaqaaq.
Taamatut oqareerluni oqaatigineqarsinnaanngikkaluarpoq Kennedyp Clintonikkut nuannarinngikkai, ilaqutariimmi taakku ukiorpassuarni ikinngutigiinnikuupput sulinngiffeqarnerminnilu angalaqatigiittarnikkuullutik. Clintonikkulli sapaatip akunnerini kingullerni qineqqusaarnerup ingerlanerani Obamamik nikanarsaaniarlutillu ammip qalipaataanut tunngasunik eqqartuillutik qineqqusaariaaseqarnerat Kennedyp sorlermik tapersersuinissaminik aalajangerneranut pissutaalluinnarpoq.
Hillary Clinton demokratit allaffeqarfitoqaanniit præsidentissatut qineqqusaartinneqaraluartoq, maanna demokratinik tapersersuisartutoqqat Kennedyp Obamamik tapersuilluni saqqummerneratigut Clintonip annaasussanngorpai. Obamallu maanna aallarteqqaatut, annerusumik inuusuttunit tapersersorneqartutut isigineqarunnaarluni allaffeqarfitoqqamiilli aamma tapersersorneqalernini nukittoqutigisussanngorpaa.
