Obama: Guantanamo matussaaq

Amerikamiut parnaarussiviat Cuba-miittoq Guantanamo, Barack Obamap præsidentinngorneranit ullut siulliit hunnorujut ingerlaneranni matuneqarnissaa naatsorsuutiginngikkaa, præsidentinngortussap oqaatigaa.
Allattoq Jaaku Lyberth
januaarip 11-at 2009 17:15

Obama præsidentimut qineqqusaarnermini neriorsuutigalugu oqaatigaa, præsidentimut qinigaaguni parnaarussivik Cuba-miittoq piaartumik matutinniarlugu.

Tamannali ilimagisamit ajornakusoorneruvoq, Barack Obama TV eqarfimmi ABC-imi apersorneqarluni oqarpoq.

Parnaarussiviup matuneqarnissaanut suliassartai inatsisitigullu aaqqitassartai sivisuumik suliarineqartussaasut Barack Obamap oqaatigaa.

Amerikamiut parnaarussivianni Cuba-miittumi Guantanamo-mi, parnaarussat 250-it suli parnaarusimaneqarput perulluliorsimasutut pasisaallutik.

Parnaarussiviup matuneqarnissaa pinngitsoorani piviusunngortinneqarnissaa Obamap oqarnermini naqissuserpaa, parnaarussivimmi taanna pillugu USA Bush-illu naalakkersuisui sakkortuumik isornartorsiorneqarmata.

Marloqiusamik isummerlungalu aalajangernianngilanga, parnaarussivik matussaaq, naalagaaffiulli inatsisai malillugit matuneqarnissaa qulakkeeqqaarniarpara Barack Obama oqarpoq.