Obama: Ataqatigiinnerusariaqarpugut
Peqqarniitsuliortarnerit silallu pissusaata allanngoriartornerata kingunerisaanik ajornartorsiutit assigisaallu aaqqiiviginiarneqassappata annertunerusumik suleqatigiittoqartariaqartoq, USA-mi præsidentinngorniap Barack Obamap Berlinimi oqalugiarnermini ilaatigut oqariartuutigai.
Demokratineersoq ulluni makkunani nunanut allanut angalavoq, ippassarlu Tysklandimiilluni. Inuit 100.000-init amerlanerusut Berlinip qiterpasissuani katersuussimapput, taakkualu takuaat Barack Obama qiimaqaluni oqalugiartoq.
Tikilluaqqusaanerminut qujariarluni, Obama Amerikamiutut innuttaassuseqarnini tunuliaqutaralugu oqalugiarnerarpoq, nunarsuarmioqataasutullu aamma oqalugiarusunnini erseqqissaatigalugu.
- Avissaartuunneq aqqutissaanngilaq, Obama oqarpoq, Tysklandillu marluk 90-ikkut aallartisimalaaginnartut kattunnerat eqqaallugu.
- Nunarsuarmioqatikka, Berlinimi pisimasut takusigit. Ajornartorsiutit qaangerneqarsinnaanerat tamanna takussutissaannaavoq, Demokratit præsidentinngorniartitassaat Barack Obama oqarpoq.
