Obama ataatsimeersuarnerup naajartornerani peqataajumallerpoq

USA-p præsidentia Barack Obama silap pissusaa pillugu Københavnimi ataatsimeersuarnerup naajartornerani ulluni pingaarutilinni immaqa peqataajumallissaaq.
Allattoq Elisa Isaksen
decembarip 04-at 2009 16:18

Tamanna præsidentip Illorsuani Det Hvide Husimi oqallisigineqartoq, præsidentip siunnersuisuata oqaatigaa.

Barack Obamap decembarip qulingiluaani Københavnimut aqqusaarsinissani pilersaarutigereerpaa, aamma silap pissusaa pillugu ataatsimeersuartuni oqalugiassaaq. Tamatumali kingorna Osloliassaaq Nobelip eqqissinermut nersornaasiuttagaanik nersornaaserneqartussaagami.

Tamatumali nalunaarutigineqareerneratigut, Obama sakkortuumik isornartorsiorneqarpoq, silap pissusaa pillugu ataatsimeersuarnerup aallartinneranut taamaallaat peqataariarluni, naammassiartornerani isumaqatigiinniarnernut pingaarutilinnut ilaaniannginnera isorineqarluni.

Nunarsuatsinni naalagaaffiit naalakkersuisullu siuttui 100-t sinneqartut, Københavnimi ataatsimeersuarnermi peqataaniarlutik nalunaareersut, ataatsimeersuarnerup naammassiartornerani isumaqatigiinniarnernut pingaarutilinnut peqataaniarlutik pilersaarutigaat, ataatsimeersuarneq decembarip 18-anni naammassissaaq.

Københavnimi ataatsimeersuarneq pisortatigoortumik ataasinngorpat ammarneqassaaq.