Obama aningaaserivinnut akiuutilerpoq

Maanna tassa taarsigassarsiat annertuumik akisussaaffilikkat taamaatinneqassapput aningaaseriviillu qanoq annertutiginissaat killilersuiffigineqalissalluni.

"Aningaasat suliffissanut, aningaaserivinnuunngitsoq, aningaasat illunut aningaaserivinnuunngitsoq", Wall Street Bankip eqqaani akerliussutsimik takutitsisut taama nilliapput, allagartarsuarnilu nassataanni allassimalluni "Tigumatussuseq toqutsisarpoq", oqaasinnaaq præsident Obamap isumaqatigissagunagaa. Præsidentip maanna aningaaseriviit aningaasanillu sullissiveqarfiit aningaasaqarnikkut ajalusoornermut USA-p 1930-kkunili aningaasaqarnikkut aatsaat taama nakkaaffigitigisimasaanut pisuutippai.

- Ajornartorsiorneq amiilaarnartoq qaangerparput Amerikamiullu akiliuteqangaarsimallutik, siornatigullu pisut uterfigisinnaanngilavut, taamaattumillu qulakkeertariaqarparput Wall Streetip Amerikamiut annaassiniarneranni akilertariaqarai taamaattumillu piisaarnersuaq atornerluinerlu aningaasaqarnitsinnik ajoqusiisoq annikillisittariaqarparput, Obama oqarpoq.

Præsidentip ilaatigut aningaaseriviit qanoq angitigissanersut siunnersuutigaa. Siunnersuummi aamma pineqarpoq aningaaseriviit inissianut taarsigassarsisitsisassanerlutik, pappiaranik nalilinnik nioqquteqarnissaminnut aammalu aningaasaliissutissat annertuumik akisussaaffeqarfiusut pillugit aalajangertassasut.

Tamatuma saniatigut Obamap aningaaseriviit aningaasaateqarfinnik piginnittuussanngitsut imaluunniit aningaasaliisarfinni namminersortunit pigineqartuni aningaasaliisassanngitsut siunnersuutigaa.

Siunnersuutip Kongressimi akueritinnissaa Obamap neriorsuutigaa Wall Streetimilu sunninniartartut naak amerlagaluaqisut akiuunnissamut piareersimavoq.

- Inuit taakkua akiuunnissaq kissaatigissappassuk taava akiuunnissaq piareersimaffigaara, aalajangerneralu nukittorsarneqaannassaaq periaasitoqqamut utertoqalersoq takugukku, Obama oqarpoq.

Obamap pilersaarutaasigut Wall Streetimi pappiarat nalillit nalingat appariarujussuarpoq.