NÛK marloriarluni finalessaaq

GSS Nuummeersoq U-15-it siorna GM-rmata marloriarluni finalerpoq. Tamanna nunaqqataasa NÛK-meersut ukiormanna anguaat U-16-nik taaneqartalersut pissartanngorniunneranni.

Unammersuarnerit aallartinneranni GSSip niviarsiartai periarfissagissaarpasikkaluarput sisamanngornermili unnukkut SAK-mut Sisimiuneersumut 22-23-mik ajorsaqqalaarnertik akisunaarpaat pointit pingaaruteqarluinnartut marluk annaagamikkik. GSSip maanna naammagiinnartariaqalerpaa bronzennanniunnissaq arfininngornermi Kâgssagssuk Maniitsumeersoq 29-19-mik ajugaaffigereerlugu.

NÛKp niviarsiartai pinngitsooratik Nagdlúnguamut Ilulissaneersumut finalemut anngutissagunik ajugaasussaanikuupput. Tamannalumi anguaat 23-19-mik ajugaangamik.

Nukappissani NÛKp aamma Norsaq HCp finalemut anngunnertik qulakkeereernikuuaat arfininngornermi unamminerit sioqqullugit ullorlu taanna Norsaq HC arsanngiffeqarpoq. NÛKp SAK Sisimiuneersoq unammivaa ajugaaffigaallu 20-14-mik.

Aajuku arfininngornermi angusat:
GSS – Kâgssagssuk, 29-19 (12-15) (niviarsissat)
Arsarluarnerpaaq: Pilunnguaq Jørgensen, Kâgssagssuk
GSS – Kâgssagssuk, 21-21 (10-11) (nukappissat)
Arsarluarnerpaaq: Nikolaj S. Nielsen, Kâgssagssuk
Nagdlúnguak – NÛK, 19-23 (11-13) (niviarsissat)
Arsarluarnerpaaq: Navarana Davidsen, Nagdlúnguak
SAK – NÛK 14-20 (8-11) (nukappissat)
Arsarluarnerpaaq: Daniel Egede Svenningsen, NÛK

Aajuku sapaammi unamminissat:
Nal. 13.00 GSS – Nagdlúnguak (niviarsissat, bronzennanniuttut)
Nal. 14.30 Kâgssagssuk – SAK (nukappissat, bronzennanniuttut)
Nal. 16.00 Kâgssagssuk- NÛK (niviarsissat, finale)
Nal. 17.30 NÛK – Norsaq HC (nukappissat, finale)