Nørrebro-mi akerliussutsimik takutitsisut 217-it tigusarineqarput

Københavnip ilaani Nørrebromi Christianshavnimilu eqqissiviilliortoqarneranit ulloq ataaseq qaangiussimalerpoq. Inuusuttut najugaqarfiat, Ungdomshuset, politiinit ippassaq ullaakkut inuerutsinneqarmat, akerliussutsimik takutitsisoqarlunilu assersuisoqarpoq, inuusuttullu akerliussutsimik takutitsisut, taakkunannga illersuisut politiillu akunnerminni ippassaq ulloq naallugu unnuarlu ilungersunangaatsiartumik akersuupput, tamannalu pisoqarfiusuni takuneqarsinnaalluarpoq.

Biilit assersuinermilu sorpassuit atorneqartut ikuallannikut sinneri maanna takussaapput, Københavnimili ullaaq manna eqqissisimanarpoq.

Taamaaginnarnissaali politiit ilimaginngilaat.

- Ilimagaarput ullup ingerlanerani akerliussutsimik takutitsisaqattaartoqassasoq, Københavnimi Politiit oqaaseqartartuat, Flemming Steen Munch, oqarpoq.

- Politeeqatigut ikiuukkiartortut Fynimiit Jyllandimiillu Københavnimut tikiussortut imaaginnavipput, pisariaqalissagaluarpallu susoqarfinnut aggeriaannaapput.

Akerliussutsimik takutitsisut 217-it politiit ippassaq ullup ingerlanerani tigusaraat.

Ippassaq eqqissiviilliortoqarnerani politiit marluk ajoquserput, annertunngitsumilli. Politiillu naapertorlugit akerliussutsimik takutitsisut aamma marluk annertunngitsumik ajoquserput.

Akerliussutsimik takutitsisuni ataasiinnaq ajoqusingaatsiarpoq, qaartartumik politiit tungaannut miloriarniartilluni qaartoorami assammini inukkani arlallit taassuma annaammagit.