Sermersuumi takornarialerinermi iliuusissaq nutaaq
Pinngortitaq pillugu aggerit - kultoorilu pillugu uninngallutit. Takornarialerineq pillugu Sermersooq Business Counsilip suliniutaa nutaaq taama qulequtaqartoq kommunimi ataatsimiititaliap marsip 22-iani suliarissavaa.
Pinngortitamut innarliinngitsumik iluatsittumik takornarialerisoqassappat taava periusissat ataatsimoorussat pilersinneqartariaqassapput, ilaatigut tikinneqarsinnaasut tamarmik immikkuullarissutaat nittarsaanneqartassallutik, Stine Selmer Andersen taama oqarpoq imalu nangilluni:
- Suliniut Colourfull Nuuk assersuutigissagutsigu tikitassap inerisarneqarneranik taallutigu inerisaavugut, ilaatigut sumiiffimmi suliffeqarfeeqqat takornarialerinerup inerisarneqaqqinnissaa pillugu qanimut suleqatigalutigit.
Stine Selmer Andersen Sermersooq Business Counsil-imi takornarialerineq pillugu siunnersuisartutut atorfeqarpoq. Taassuma suleriusissanut tunngatillugu siunissaq ungasissoq isigalugulusooq suleriaasiliortoqarnissaa, ilaatigut tikitassat ataasiakkaat tamarmik immikkut ukkinneqarlutik takornarialereriaasaasa pitsanngorsarneqarnissaat pingaartitarisuullugu.
- Suleriusissami siunnersuutit tigussaasut arlallit assersuutigisinnaavakka, soorlu perusuersartarfiit, illuaqqallu immikkut tikkuartuuppakka, tamakkuuppulli suliffeqarfeeqqat kivitseqataaffigisassaat.
Kommunilli sinaakkutissiortussaaneri naqissuseqqippaa, takornarialerisullu siunissami takornarialerinissap inerisarnissaanik isumaginnittussaanerarlugit,
- Pisortat suliffeqarfiugatta sumiiffinni suliffeqarfinnik ataasinnguamilluunnii unammillertussaanngilagut. Taamaattumiguna suliavut naapertorlugit periusissanik sinaakkutissiuinnartugut, takornarialerisullu namminersortut taamaalilluta tapersersorniarlutigit.
Quassussuarmi pisuttuartunut aqqutissat nunap assiliornissaat, kommunillu Ittoqqortoormiuni mersortarfissaani puisit amiinik takornarianut tunisassiornermik suliaqarfiusussat innersuussutinut 53-iusunut ilaapput, taakkuli kommunimit akuersissutigineqareerpata aatsaat suliniutit piviusunngortinneqarsinnaapput.