Ny Alliance 10.000-it sinnerlugit ilaasortaqalereerpoq

30 tiimit ataallugit pisoqaassuseqarpoq 10.000-illu sinnerlugit ilaasortaqalereerluni. Danmarkimi partii nutaaq NyAlliance taama inissisimavoq. Ilaasortanngortut ilagaat Aqqusinikkut angallannermi isumannaallisaanikkut siunnersuisoqatigiinni siulittaasutut tunuaqqammersoq Rene la Cour Sel, Det Radikale Venstret sinnerlugit folketingimut qinigassanngortinniaraluartoq. Taassuma nassuerutigaa partiimut nutaamut ilaasortanngornermigut qinigaanissani ilimanarnerulersoq.

- Pingaarutilinnik oqalliseqarnissamut periarfissiilluarpoq. Sianiilliornerussaaq periarfissaq taama pitsaatigisoq atorluarnianngikkaanni, Rene la Cour Sel oqarpoq.

NyAlliancemut ilaasortanngorusuttut ilagaat Bjarne Møgelhøj maanna Centrum Demokratinut siulittaasuusoq. Taassuma ilaasortanngorusunnera ima sakkortutigaaq, allaat Centrum Demokratit siulersuisuuneri tallimanngorpat ataatsimiilerpata siunnersuutiginiarlugu, Centrum Demokratit atorunnaarsinneqassasut ilaasortallu NyAlliancemut ilaasortanngussasut.

- Maanna sunniuteqarluarsinnaasumik partiimik pilersitsisoqarpoq, CD-p isumaannut qanittumik isumalimmik. Taamaattumik periarfissaq atorluarniartariaqarpoq, Bjarne Møgelhøj oqarpoq.

Ministeriunerup Anders Fogh Rasmussenip ullumikkut tusagassiortunik katersuutsitsinermini NyAlliance tikilluaqquaa.

- Isumaqarpunga illuatungiliuttut akornanni ineriartortoqarnera ajunngilluinnartoq. Tassami ilaatigut partiitoqqaminnit anillutik naalakkersuisunut isumaqatigiinniarusulermata, tamanna pitsaasutut isigaara,Anders Fogh Rasmussen oqarpoq.