Nuuttut amerlanerit ajornartorsiortarput
Oqinnerusumik inuuneqalernissaq anguniarlugu nunaqqaterpassuagut inissaqaratik suliffissaqaratillu Danmarkimut nuuttarput. Ikittuinnaat oqinnerusumik inuuneqalertarput. Nunatsinni artorsaatit Danmarkimut nuunnermi oqimaannerulersarput.
Kalaallit Århusimut inissaqaratik nuuttut ukiup affaani kingullermi amerleriarput. Tamannalu nuuttunut oqitsuinnaanngitsoq Århusimi kalaallit illuutaanni inunnik siunnersorti Simon Lynge oqarpoq:
- Erngerluta inissaannik nassaarsinnaaneq ajorpugut.
Ålborgimi Kalaallit illuutaanni inunnik siunnersortip Jyllandip avannaani inissarsiuussisarneq ajornannginnerunerarpaa.
- Inissiaatileqatigiiffiit assigiinngitsut namminersorlutillu attartortitsisartut ukiut arlalialunnguit matuma siorna akisoorujussuarnik attartortitsisarmata inissarsiuussisarnerput ajornanerugaluarpoq. Ukiorli manna ajornannginneruvoq, inunnik siunnersorti Vibeke Sieborg oqarpoq.
Taannali isumaqarpoq Ålborgimi inissarsiornerit nuunneqartariaqanngitsut.
- Kalaallit Nunaanniit nuuttartut inissarsiornerinnaq oqimaarsaatigineq ajorpaat aamma inuttut nammineq atugaat oqimaattooreertarput. Ilaat imigassamik ajornartorsiuteqartarput ilaallu misigissutsimikkut ajorsartarlutik Danmarkimut nuunnerminni nammatatik tamakku nassartarpaat, Vibeke Sieborg oqarpoq.
Taanna isumaqarpoq taamatut Kalaallit Nunaanniit Danmarkimut nuuinnarluni nuunnermi nammatat oqimaareersut oqimaannerulersinnaasartut.
- Kalaallit Danmarkimut nuuttartut ilaat oqinnerusumik inuuneqalertarput. Ilaqarpulli aamma oqimaannerusumik inuuneqalersartunik. Soorlu assersuutigalugu ilaat angerlarsertarput. Ilaallu danskisut iluamik oqalussinnaaneq ajornertik peqqutigalugu artorsarnerulersarlutik. Aamma kulturitta inooriaatsittalu assigiinnginnerujussuisa kingunerisaanik ilanngui naatsorsuutiginngisaminnik artukkerneqartarput. Tamakku tamaasa Danmarkimut nuunnginnermi eqqarsaatigeqqaaqqunaqaat, Vibeke Sieborg nagaasiivoq.
Danmarkimut nuunniarluni eqqarsarneraanni sutigut piareersimasariaqarluni Kalaallit illuutaasa nittartagaanni www.groenlandskehus.dk-mi
atuarneqarsinnaavoq.
