Nuusuarmi oqaluffittaarnissaq anguniarneqaqqilerpoq

Nuummi Nuussuarmi oqaluffiliortoqarnissaa illussanik titartaatitsilluni unammisitsinikkut aallartisarneqarnissaa angorusullugu Inatsisartut siulittaasuat Jonathan Motzfeldt, Siumut, Inatsisartut aningaasaliinissaat siunnersuutigaa.

Jonathan Motzfeldt oqarpoq oqaluffimmik imaani angalasuusunut tunngatitaasumik aaqqissuunneqarnermigullu isikkumigut sungiusimasatsinniit allaanerusuuusinnaasumik ilersitsiniarnermi

aningaasanik katersiniassagaanni aalartiffeqartariaqarmat, taamaattumik titartaasitsilluni unammisitsinissamut aningaasaliinissaq siunnersuutigigini:

- Titartaasitsilluni unammisitsineq ataasiaannarluni aningaasartuutissaavoq, kingorna avammut aningaasanik katersuiniarnerni tapersersuisussanillu ujaasinermi takutitasaqaraanni aningaasanik pissarsisinnaanissaq ajornannginnerussaaq, Jonathan Motzfeldt oqarpoq.

Jonathan Motzfeldt aamma oqarpoq inuttaasunut oqaluffiunermi saniatigut aamma imaani umiartortunut oqaluffiusinnaasoq, allatut titartarneqarsimasoq aammalu inuit naapiffigisinnaasaanik kaffisortarfeqarsinnaanera

takorloorneqarsinnaasoq.

Jonathan Motzfeldt oqarpoq maanna Nuussuarmi Qinngorpimilu inuttusiartuinnartuni oqaluffeqalernissa pingaaruteqartoq, aammalu Inatsisartut tamanna akisussaaffigigaat:

- Pingaarnerpaavoq kristumiuugatta kristumiutullu pisussaaffipput eqqarsaatigalugu pisussaavugut illoqarferujussuaq oqaluffeqartissallugu, Jonathan Motzfeldt oqarpoq.

Siunnersuut Inatsisartuni ullumi siullermeerluni oqaluuserineqarpoq. Aappassaanik oqaluuserineqareernerani aalajangiunneqassaaq siunnersuut akuerineqarnersoq.