Nuussuup avataa uuliasiorfissatut piareersarneqalerpoq
Nunatsinni uuliaqarneranik misissueqqinnissamut atatillugu, paasisat nutaat tunngavigissagaanni, Nuussup avataani immap naqqani uuliamik aniasoqartoq, Aatsitassanut Ikummatissanullu Pisortaqarfik nalunaarpoq.
-Siornagulli ilisimaneqareerpoq Nuussuup nunataani uuliamik seerisoqartoq. Satelittikullu assilisat tunngavigalugit Nuussuup avataani immap naqqani uuliamik aamma aniasoqartoq paasineqarpoq, aatsitassanut Pisortaqarfimmi immikkoortortaqarfiup pisortaa Jørn Skov Nielsen oqarpoq, oqaatigaalu Nuussuup nunataani uulia seerisoq naamaneqarsinnaasoq.
Nunarsuarmi uliasiortut annersaat marluk misissueqqinnissamik soqutiginnittut, immallu naqqanik sajuppillatitsisarluni misissuinerup paasissutissartaat pissarsiarerusussimagaat, Jørn Skov Nielsen oqarpoq, erseqqissaatigalugulu uuliaqarneranik misissuinissat sioqqullugit Nuussuup avatangiisaa avatangiisinik misissuisartut sukumiisumik misissoqqaassagaat.
Nuussuarmi eqqaanilu uuliaqarneranik misissuinissat ukioq manna januaarip aallaqqaataaniit 2006-mi decembarip naaneranut matoqqatinneqarput.
