Nuussuarmiit Qaanaaq tikillugu uuliasiulerput
Taava uuliasiorfiit septemberi tikillugu uppernarsarniartussaavaat akisussaassuseqartumik ernumananngitsumillu issittumi uuliasiorsinnaassuseqarnertik, akuerineqartullu ukiup tulliani majip tungaanut qinnuteqaateqarsinnaalissapput uuliasiorfissaminnik. Taava imarujussuarmi Nuussuarmiit Qaanaap tungaanoortumi sikoqaqisumilu uuliasiorsinnaanissaq ukiup tullianiit 2011-miilluunniit aallartissinnaassaaq. Taamatut oqaluttuarpoq Hans Kristian Olsen Nunaoilimi pisortaasoq.
Uuliasiornissamut akuersissutit ukiuni qulini atuuttarput nassaartoqarpalli ukiunik 30-nik ilaneqarsinnaallutik.
Nunaoilip ukioq manna 9,5 million kronet atussavai immap naqqani sajuppallattitsisarluni misissuissalluni TGS-nopec suleqatigalugu. Kiisalu qaammataasakkut Infoterra suleqatigalugu immap naqqani uuliamik seerisoqarnersoq misissortittussaavaa.